Vyama vitano vyachukua fomu za uteuzi Uchaguzi Mdogo Jimbo la Mbarali

Imewekwa: August 14, 2023

Vyama vitano vya Siasa vimechukua fomu za uteuzi wa wagombea Ubunge katika Jimbo la Mbarali Mkoa wa Mbeya kuwania kiti hicho katika Uchaguzi Mdogo wa Ubunge unaotarajiwa kufanyika tarehe 19 Septemba mwaka 2023.

Vyama vilivyochukua fomu ni Chama cha AAFP kikiwakilishwa na Bi. Halima Abdalah Magomba, Chama cha DP kupitia kwa Bw. Osward Joseph Mndeva, Chama cha UDP kikiwakilishwa na Bw. Zavely Laurent Seleleka, Chama cha CCK kilichomtea Bw. Exavery Town Mwataga kuwa mgombea wake na Chama cha UPDP kikiwalishwa na Bw. Bosco Daudi Mahenge.

Wagombea wa vyama hivyo wamekabidhiwa fomu za uteuzi na Msimamizi wa Uchaguzi Jimbo la Mbarali Bw. Missama Kwangura katika Ofisi ya Msimamizi wa Uchaguzi zilizopo Halmashauri ya Wilaya ya Mbarali.

Akizungumza wakati wa kukabidhi fomu hizo, Bw. Kwangura aliwakumbusha wagombea wa vyama hivyo kujaza fumo hizo kwa usahihi ikiwemo wadhamini wasiopungua 25 walioandikishwa kwenye Daftari la Kudumu la Wapiga Kura la Jimbo la Mbarali.

“Kwa kuzingatia taratibu za uteuzi baada ya kujaza fomu hizi mnaweza kuzileta siku tatu kabla ya siku ya uteuzi ili tuweze kuzihakiki na kufanya marekebisho pale ambako kuna mapungufu katika kujaza fomu hizi” alisema Bw. Kwangura.

Aliwapongeza wagombea hao kwa kuonesha nia ya kugombea kiti cha Ubunge katika jimbo hilo kwani hatua hiyo inaimarisha demikrasia katika uchaguzi nchini.

Utoaji fomu za uteuzi kwa wagombea umeanza jana tarehe 13 hadi 19 Agosti, 2023 ambayo itakua siku ya uteuzi wa wagombea katika Uchaguzi Mdogo wa Ubunge Jimbo la Mbarali na Udiwani katika Kata Sita za Tanzania Bara.

Kwa mujibu wa ratiba ya Tume ya Taifa ya Uchaguzi kampeni za uchaguzi zitaanza tarehe 20 Agosti hadi tarehe 18 Septemba na tarehe 19 Septemba, 2023 itakuwa siku ya kupiga kura.