Tume yawataka wanaokwenda kujiandikisha wawe na namba za simu ili kuendana na matakwa ya mashine za BVR

Imewekwa: July 28, 2019

Tume ya Taifa ya Uchaguzi imesisitiza kuwa Watanzania wanaokwenda kuandikishwa kwenye Daftari la Kudumu la Wapiga Kura wawe na nanmba za simu za mkononi kwani mashine ya BVR hairuhusu kumuandisha mwananchi bila kuweka namba ya simu.

Hayo yamesemwa na Mjumbe wa Tume ya Taifa ya Uchaguzi, Mhe. Balozi Omar Ramadhan Mapuri wakati akitoa elimu ya mpiga kura kupitia redio ya Victoria FM ya Bunda mkoani Mara.

Balozi Mapuri alisema kila anayekwenda kuandikishwa aende akiwa na namba ya simu kwa sababu bila ya kujaza namba ya simu mashine za BVR haziruhusu uandikishaji uendelee.

Uboreshaji wa Daftari la Kudumu la Wapiga Kura unaendelea katika mikoa ya Manyara na Simu na katika halmashauri nne za mkoa wa Mara kuanzia Julai 31 hadi Agosti 6 mwaka huu.

Halmashauri hizo ni Halmashauri ya Wilaya ya Bunda, Halmashauri ya Wilaya ya Butiama, Halmashauri ya Wilaya ya Serengeti na Halmashauri ya Mji wa Bunda.