Tume ipimwe kutokana na utendaji kazi wake - Jaji Lubuva

Imewekwa: August 28, 2017

Akizungumza na Waandishi wa Habari katika banda la Tume ya Taifa ya Uchaguzi kwenye viwanja vya SabaSaba jijini Dar es Salaam amesema, licha ya kuwa Mwenyekiti na Wajumbe wengine wa Tume wanateuliwa na Rais, Tume imekuwa ikifanya kazi zake kwa uhuru bila kuingiliwa na mtu yeyote, taasisi, au hata viongozi walioko madarakani.

Jaji Lubuva amesema kuwa uhuru wa Tume ambao Wananchi wengi wamekuwa wakiuzungumzia ni fikra tu za mtu anavyodhani juu ya namna Tume iundwe na si utendaji halisi wa Tume namna inavyotekeleza majukumu yake.

Ili kuondoa dhana hiyo, Tume ya Taifa ya Uchaguzi imependekeza katika katiba inayopendekezwa kuwa mfumo wa kuwapata Wajumbe wa Tume ya Taifa ya Uchaguzi ufanyiwe marekebisho ili kuwapata wajumbe kwa njia tofauti na ilivyo sasa.

Hata hivyo Jaji Lubuva ameshauri kuwa, Wajumbe wanaounda Tume ya Taifa ya Uchaguzi wasitokane na itikadi za vyama vya siasa ili kuepusha mgongano wa kimaslahi ambao unaweza kujitokeza katika utekelezaji wa majukumu hasa wakati wa kufanya maamuzi.

Akitolea mfano Tume ya Uchaguzi na Mipaka ya Kenya, iliundwa kutokana na mapendekezo ya katiba mpya na kuitwa kuwa ni Tume huru lakini hivi sasa wale ambao hawakushinda katika Uchaguzi uliosimamiwa na Tume hiyo wameeleza kuwa Tume ya sasa ni mbaya zaidi kuliko iliyokuwepo hapo awali.

Mwenyekiti Lubuva ametoa wito kwa Wananchi wa Tanzania kuwa wasifikiri kuwa jina la Tume kuitwa huru ndio linaifanya Tume kuwa huru, bali uhuru wa Tume unatokana na utendaji kazi wake bila kuingiliwa na mtu, taasisi, au kiongozi yeyote aliyeko madarakani.

Jaji Lubuva ametembelea mabanda mbalimbali katika maonyesho ya SabaSaba yanayoendelea likiwemo banda la Tume ya Taifa ya Uchaguzi, Jeshi la kujenga Taifa, Bunge la Jamhuri ya Muungano wa Tanzania, Mahakama Kuu na Pride Tanzania.